Tuesday Poem:A Young Mother’s Monologue by Timilehin Olagunju
Belle dey worry me before.
To sleep sef, dat one na yawa
because say I wan born pikin;
now wey I don born,
pikin come dey worry me
I tap my husband, make him wake up,
make him change Baby pampers,
make me sef close eye small,
he say that one na woman job,
when e dey sweet am,
him no talk that one o!
See as this yeye man dey snore,
no be him give me belle ?
No be him pikin I carry ?
Shebi him talk say him go love me tire ?
Shebi he talk say he fit die for me ?
No be now now night just fall?
I never close eye reach one hour
cock don crow already
Baby dey suck suck
Baby no gree me sleep
As Baby reach three weeks,
my yeye husband come again
he dey smile, dey rub my back;
e be like say I recover fast fast,
he tell me say I don dey fine again o,
he wan make e dey sweet am again !
Timilehin Olagunju is a medical doctor who currently practices in a community hospital. He is a tech geek, happily married, and a father to a beautiful girl.
Photography credits: Emebiriodo Ugochukwu
This is beautiful,
I smiled throughout…thanks for sharing.
A down-to-Earth rendition! So natural, yet so real. Well done Dr. Tims